Guzarish

Ho sake to tum ab laut kar na he aana
Main lakh duaon mein tumhe maang loon
Tumhari chaah mein roz kat’ta rahoon
Tum wahin rehna, uske paas, mujhse door

Kyunki agar kisi khwab se nikal kar, tum Laut bhi aayin
Tab bhi tum wo nahi hogi jisse mujhe pyaar hua tha
Pehli mohabbat ke baad tum badal gayi hogi
Uske pyaar ne tumhe badal diya hoga

Tum aayin bhi to na jaane kaise rahogi
Aasteen chadhane ki aadat se le kar
Chutki mein cigarette pakadne ke tareek tak
Sab kuch tumhe uski yaad dilaayega, dil jalayega

Mera tumse apni muhabbat ke vaade karna
Tumhari tareef karna, tum par Fida ho jaana
Ye sab jo tumhare saath pehle bhi hua hoga
Kya is baar bhi tumhe in par pyaar aayega ?

Main agar tehelte hue tumhara haath pakad loon
Kabhi kisi baat ke beech mein tumhe Yun he choom loon
Tumhara naam le kar uske aage apna naam jod doon
Kya tumhe bhi utna he achha lagega jaise pehli baar laga tha

Aise bohat se sawaal hain mere jo raat’on ko sone nahi dete
Wo raatein, zindagi ki tarah, beet jaati hain
Aadhi tumhe yaad karne mein
aur aadhi tumhe bhool jaane mein