Haarna aur Jeena

Ye hatasha ye udaasi koi nayi baat to nahi
Pehle bhi to kitni baar hua hai yun he
Ki khoon se seenche khwaab aankho se beh gaye
Aise aur bhi to kayi muqaam the pehle jahan
Manzil saamne thi par raaste kho gaye the
Aur qismat aankh mila kar ojhal ho gayi

Seene mein udta ye ghubar-e-gham naya to nahi
Ye duniya khatam ho jaane ki hatasha
Ummedon ke ghut’ti hui cheekhein
Hasraton ka dekhte dekhte vehshat ban jaana
Khwahish ka khalish banne ka ye andhera safar
Dil-e-naummeed mein bante bigadte Vasvase

Jab ye sab Naya nahi to in par hairani kyun
Ye uljhan kyun ye afsos-daari kis baat ki
Shajar par naye patte sada aate rahenge
shorish-e-zindagi yun he chalti rahegi
Lazzat-e-giriya-o-zaari se dil oob jaaye jab
Badhe chalo agle sabab-e-giriya ki taraf