Neknam, Badnam aur Gumnam

Pyaari Fareha,

Ummeed aur dua karta hoon ki tum theek hogi.

Zindagi ki masroofiyat’on ki wajah se bohat din se tumhe likhne ka waqt nahi mil raha tha. Aur phir hua yun ki hafto se jama ki hui chuppi jab mahino tak badh jaati hai to phir se raabta qayam karna bohat bhaari kam lagne lagta hai.

Par phir aisa kuch ho jaata hai ki raha nahi jaata. Taqdeer aur waqt ke khel he aise he hain. Ghabrao mat, sab theek hai.

To khair, hua kuch yun ki abhi kuch din pehle, ek bohat thaka dene waale din aur shaam ke baad jab hum raatr mein ghar laut rahe the, to gaadi chalate waqt ek naya gaana baja. Bohat din baad ek aisa gaana jise pehli baar sunte he pasand aa gaya; itna ki steering wheel chhod kar taali bajane lage. Wo baat aur hai ki us waqt hum shadeed traffic mein phanse the aur gaadi ke kahin jaane ke imkaan nahi the. Gaane ka naam hai “Tasveer”, jise Ali Brothers ne gaaya hai aur bol Pal Lopon ne likhe hain; jis line ne humse taali bajwa di wo kuch yun hai

Main Jini Waari Teri
Tasveer Vekhi Honi

Ohni Vari, Ohni Vari
Ranjhe Ne Na Heer Vekhi Honi

Hain na khoobsurat? Aur kitni sachchi? Hume lagta hai ki duniya mein chaahe jitne bhi mashhoor gaane ho, agar aap unse relate nahi kar paate to wo achhe nahi lagte. Ye gaana, khud mein chaahe jitna surmayi sa ho, relatable bohat lagai.

Haan par ye khat in lines ki wajah se nahi likha jaa raha. Is gaane ki shuruati line ki wajah se likh rahe hain

Tere Ishq Ch Badnaam Howa Sanu Ae Badnami Changi

Duniya De Taaj Te Takhta O Sanu Teri Gulaami Changi

Baat asal mein ek aur din ki hai jab der raat kisi jagah se laut’te waqt gaadi mein kuch dost bhi the aur tab ye gaana unhe sunane ke liye lagaya tha. Pehli line sunte he humari ek dost ne kaha ki

nahi bhai hume badnami to nahi ab ishq mein

Bas isi baat par dimagh ek khayal kaundha ki ishq mein badnam hona bhi chalo khair ek maqool anjaam ho sakta hai, jaisa ki kayi afsaanvi qirdaro ka raha hai, par unka kya jinhone ne ishq bhi kiya par gumanm he rahe?

EK sawal aaya ki aise log kaun hote honge? tp phir jawab aaya ki wahi ek tarfa ishq karne waale log honge, aur kaun. Agla he khayal is nukhte ko durust karte hue aaya ki nahi, kayi ek tarfa aashiq seena thok kar ishq karte hain, poori duniya ko unki muhabbat aur uske anjaam ka pata hota aur wo fakhriya use zor shor se manate hain. Aur phir isi tarah ye khayal aur pukhta hota chala gaya. Lamha dar lamha dimagh isi uljhan mein giraftar hota kaya ki kaisi kaifiat hoti hogi un logon ki jo kabhi izhaar bhi na kar paaye honge apni zindagi ki sabse qeemti ehsah ka. Halanki ye mumkin hai ki saamne waale ko is baat ka nadaaza ya had-ba-had ilm bhi ho ki agla shakhs uske baare mein kya mehsoos karta hai par jis tarah ke khud pasand log aaj kal hain, aisi bedari ki ummeed mushkil hai. Reh reh kal dil mein Sanjay Singhania/Sachin aur Kalpana ki love story yaad aati rahi. Dil mein aur koft badhti gayi.

Us raat humne bohat der tak socha ki aakhir aisa kyun hota hoga? Aisi kya majbooriyan rahin hongi ki koi apne andar ke itne bhaari ehsaas ko bas ek kasak bana kar ta umre rakhe aur phir wo saari muhabbatein jo wo kisi par luta sakta tha, unhe apne saath le kar aise he mar jaaye? Socho jab wo ishq-e-naa-muraad mein mubtila hua shakhs apne mehboob ke saamne jaata hoga to uski kya kaifiyat rehti hogi? Kis tarah wo apne aankho se apni muhabbat chhupata hoga? Kaisi uski zubaan ruk jaati hogi use pyaar se pukaarne se, kaise wo apne haatho ko rokta hoga apne dilbar ke baalon ko sanwaarne se, use baanho mein bhar lene se? Wo jab bhi koi baat sochta hoga, ya koi post dekhta hoga, jis se use apni jaan ki yaad aaye, wo kitna kilasta hoga ki wo apni baat us tak naho pohocha sakta. Mujhe bohat bura laga ye soch kar, socho jo jee raha hota hoga uska kya haal hota hoga. Roz ek dard aur aziyat ko chhupana, aur wo bhi usi shakhs se jo us aziyat ki wajah bhi aur dava bhi.

Beherhal, zehen mein jawab bohat se aaye, maslan ho sakta hai ki us shakhs ko apni pabandiya’n pata ho, use pata ho ki jo wo chaah raha hai use paa lene se uske aas paas cheezein kharab ho sakti hain, aur isliye mu’aashara ki wajah se wo yun hi sab kuch qurbaan kar de. Halanki ye bohat he buzdil si wajah hai par bohat aam bhi hai. Aur is haala tmein bhi log izhar to kar he dete hain.

EK doosri, aur humari samajh mein bohat ahem wajah “ehsas-e-kamtari” lagi hume. Mu’aashare se haarna baad ki baat hai, agar shakhs khud se haar jaaye to koi bacha nahi sakta. Isi baat se zehen mein ek ek kar ke kuch log aur unki bohat saari rivaayaten yaad aati gayin. Aise mein ek sawal bohat uchhalta hai “main us ke qabil nahin hoon” Is ek jumle ko na jaane kitne log apni bechargi ki laathi bana kar zindagi kaat dete hain. Main aksar unse poochhna chaahta hoon ki wo is nateeje par aaye kaisa aur yaqeen maano Fareha mujhe aaj tak koi mutmaayen jawaab nahi de paaya hai. Zyadatar log apne khaas shakhs ki kisi ek bahari ada ya khasiyat ki daleel de kar reh jaate hain:

wo bohat khoobsurat hai

uski height bohat achhi hai

uski aawaz lajawab hai

uska rang bohat saaf hai

In saab bewakoofi bhari baateon par jab main poochhta hoon ki in sab khoobiyon mein us shakhs ka kya haath hai to koi jawab nahi milta. Agar khuda ne kisi ko kisi khaas tarah se banaya hai to us mein us shakhs ki kya qaabliyat hai. Ye to banane waale ka hunar hai. Aur is tarah ki jaahilpane ki baaton se wo log ye ishaara karte hain ki wo jo in khoobiyon mein shayad peechee ho unhe upar waalo ne kharab banaya hai. Seedhe khaaliq par he na ahli ka daawa kar diya. Hume aise logon par aur bhi afsos hota hai ki ye apni poori zindagi jis ghutan mein guzaar dete hain uski wajah unki khokhli soch hoti hai. WO ek shakhs jo unhe nahi mila hot ahai, wo naa jaane hue bhi unke liye paimaana ban jaata hai duniya ke har kisi shakhs kop naapne ka. Zindagi mein agar koi aur muhabbat aati bhi hai to wo usi paimaane ko le kar khade ho jaate hain aur aakhir mein ek aisi cheez ko kho dete hain jo unke khayalo ki muhabbat se zyada achhi aur sachchi bhi hoti hai. Hume aise logon ke liye bohat afsos hota hai.

Khair Fareha, wajah chaahe kuch bhi ho, ye boaht he na-waajib baat hai ki koi apni saari zindagi kaat de kisi ki muhabbat mein aur saamne waale ko khabar bhi na ho. Is baat ko soch soch kar he ek tees uthti hai dil mein. Jaane kitni zindagiyan aabad ho sakti hain agar aisa na ho to. EK shakhs jo kisi doosre ko pasand karta hai, agar wo apna haal e dil bata de to shayad use uski muraad mil he jaaye, uski ye harkat us doosre shakhs ko ek kam muhabbat waali zindagi se bacha he le jaaye.

Ye bohat saare agar, kaash aur magar mujhe ab sone nahi dete hain. Main sochta hoon ki main kitna naseeb waala hoon ki main tumse apni saari batein kar sakta hoon, mujhe ye ikhtiyar hai ki main apne dil ki baatein tum se kar sakoon. Aur kar bhi chuka hoon, pehle bhi. Mujhe is baat ka sukoon hai ki jab bhi main tumhare saamne aata hoon, tumhe pata hota hai ki main tumse kitna pyaar karta hoon. Mere liye ye ek chhoti si tasaali ki meri muhabbat gumnam nahi hai, kisi bhi bade khazaane se zyada qeemti hai.

Warna na jaane is duniya mein kitne he aise log honge jo tumse mile honge, tumse baat ki hogi aur tum par dil haar baithe honge. Jab wo roz subah uthte honge to ek lamhe ke liye sochte honge ki tumse baat kar lein, tumhare saamne aate honge to sochte honge ki sab izhaar kar dein par phir apne is khayal ko apni hasi mein daba kar chale jaate honge tumhare saamne se. Albatta, shayad uthte-baithte wo tumhara naam lete ho, par tumhare saamne wo badal jaate honge. Isi sab ko soch kar main khush hota hoon ki main apni muhabbat ko apne chehre par rakh kar chalta hoon aur har baar jab tumhe dekhta hoon to tumhari aankho mein padh bhi sakta hoon. Ho sakta hai ki agar kal ko in mein se koi haara hua shakhs itni himmat juta le ki wo tumhe sab bata de, aur tum shayad uska saath de kar aage chali jao, par tab tak, us aakhri ghadi tak mujhe apni muhabbat par fakhr rahega.