Mujhe yaad sab kuch hai, Main bhoola kuch bhi nahi

Tumse Judi kayi baatein yaad hain ab bhi
Baatein Jo bhool jaane par tum naraz ho jaya karti thi
Wahi baatein Jo ab bhulaye nahi bhoolti hain
Tumhe shayad ye Jaan kar khushi ho ki
Mujhe yaad sab kuch hai
Main bhoola kuch bhi nahi

Tumhare Ghar ke masle masail
Tumhare aabayi qisse
Tumhari badi behen ki shikayatein
Tumhare rishtedato ki hikayatein
Mujhe yaad sab kuch hai
Main bhoola kuch bhi nahi

Tumhare Ghar ke saare raaste
Tumhari dosto ke mobile number
Tumharae cafe ka pasandeeda order
Tumhare baalon ki khushboo
Mujhe yaad sab kuch hai
Main bhoola kuch bhi nahi

Log kehte Hain ki hume ab kuch yaad nahi rehta
Doctor kehte Hain ki yaaddasht kamzor hai
Amma ka ilzam mobile to dosto ka shaq kaam par hai
Ab in sab ko bhoole bhatko ko kaise bataun ki
Mujhe yaad sab kuch hai
Main bhoola kuch bhi nahi

Tumhari yaum-e-paidaish ki tareekh
Apne raqeeb ki paidaish ki tareekh
Humare tarq-e-talluqat ki tareekh
Tumhari shaadi ki tareekh
Mujhe yaad sab kuch hai
Main bhoola kuch bhi nahi